港男濫交　冠絕亞洲




港男濫交情況冠絕亞洲。杜蕾斯以互聯網及面談方式調查全球逾 2.9萬人，當中包括 508名港人，發現港男每人平均有 16名性伴侶，較 07年同一項調查的 14人增加，也多於內地男士平均 5人，遠超平均只有 4名性伴的港女。
                                                      


港男不忠贏港女　16性伴3成偷食

               
                                
所以話，「龍豬」唐英年嘅感情缺失、陳冠希同16歲中學女生Cammi嘅情慾照、陳浩民嘅酒後「輪淫」，通通都只係香港呢個色慾都市嘅冰山一角、九牛一毛。呢班桃色醜聞嘅主角，只不過反映咗香港人性愛開放嘅現實，有錯，都係社會嘅錯。
點解咁講？安全套生產商杜蕾斯久唔久就做一次嘅「全球優質性生活調查報告」又有新嘢發表嘞。今次嘅報告話，港男港女都係不忠嘅族群。先講港男，有29%承認對伴侶不忠，比起中國（22%）、印尼（13%）、美國（10%）、同英國（8%）都普遍。調查講到港男好倜儻好濫交咁，報告話受訪嘅港男平均每人擁有16個性伴侶，相比中國同印尼嘅男性只有五個，拋甩九條彌敦道。


變染性病高危一族
港女都唔弱，由第一次性行為到受訪嘅時候，每位港女平均擁有四個性伴侶。調查仲顯示，有16%港女有不忠行為，比起北妹、台妹都要豪放。呢個調查喺36個國家同地區訪問咗近三萬人，結果發現，有12%受訪港女自爆，佢哋發生第一次性關係對象，唔係相識好耐。
杜蕾斯嘅結論係，咁多港男不忠，加上港女又缺乏對伴侶過往性經驗嘅了解，令港女成為染上性病嘅高危一族。今日係世界愛滋日，報告指出，香港人對性伴侶缺乏了解，對HIV病毒嘅資訊亦知得好少。尤其是港男，佢哋近半喺第一次發生性行為嘅時候並冇採取任何預防愛滋病嘅措施。感情缺失事小，身體健康事大，希望疑似下任特首汲取教訓，珍惜生命。